بودي يكتب: ٨ طرق لآرت ثيرابي من البيت
في الحبسة دي مهم أوي نعرف إزاي نقدر نخصّص وقت من يومنا ونخرَّج طاقة سلبية، ونقلّل التوتُّر اليومي في حياتنا حالياً نتيجة الأزمة الموجودة بسبب فيروس كورونا... ممكن نعمل ده باستخدام أدوات وخامات متاحة في بيوتنا، وكمان نقدر نعمله مع شركائنا في البيت ونكسر الروتين الاجتماعي المتعارف عليه في البيت المصري.
(ِArt Therapy) ايه هي المداواة بالفن
هي استخدام الفنون في تحسين الصحة النفسية، زي الرقص، والموسيقى، والنحت، والرسم. وتم إثبات فعاليتها، وهي واحدة من الحلول للتقليل من التوتر والاكتئاب، وكمان فرصه جديدة دايماً لاكتشاف النفس والترفيه عنها.
ليه المداوة بالفن طريقة فعالة في تحسين صحتنا النفسية ؟
السبب ورا نجاح المداواة بالفن هو إنها بتوفرلنا بيئة آمنة، خالية من الاحكام، أو السُلطات؛ نقدر نستكشف ونلاحظ مشاعرنا فيها، الظاهر منها والخفي. كمان المداوة بالفن هي مثال حي للحرية؛ حيث إنه مفيش فيها قواعد، ومفيش صح أو غلط، لعب بس واستكشاف لمشاعرنا وأنفُسنا.
هنذكُر بعض التمارين البسيطة اللي ممكن تساعدنا في البيت لتقليل التوتر، وبالخامات والأدوات المتاحة عندنا:
١ - هنشخبط
ممكن نستخدم أي نوع أقلام (ألوان خشب، أو رصاص، أو باستيل، أو طباشير) ومساحة مناسبة من الورق الأبيض. نسمح لنفسنا بالشخبطة بدون حكم أو تحليل، ممكن نغمّض عنينا لو ده بيساعدنا أكتر. نجرّب نشخبط واحنا متحكّمين في إيدينا لوقت ووقت تاني نسيبها حرَّة ونجرّب واحنا مش متحكمين فيها. بعد ما نخلص ناخد خطوة لورا... ونتخيّل الأشكال الناتجة من الشخبطة، ونسيب لنفسنا الحرية إننا نلوّن أو نضيف تفاصيل عاوزينها. دي مساحة حرة ليدك وعقلك.
٢ -ارميها
ورق وقلم واكتب أفكارك السلبية أو الحاجات اللي مضايقاك أو مخوّفاك، أو حتى عبّر عن قلقك أو غضبك. تخيّل الورق ده زي ورق الشجر وهو بيقع في الخريف، وارمي أفكارك ومخاوفك معاه.
٣ -انا بحب ايه
نكتب الحاجات اللي بنحبها في نفسنا أو في حياتنا أو في غيرنا، ونحكّي عن مميزاتنا ونسمع نفسنا أكتر، ونعبّر عنها بالألوان زي ما بنشوف ألوانها جوّانا.
هنعمل “ خريطة الحب” اللي هنكتب فيها احنا بنحب ايه
٤ -لعب بالألوان
نجيب ألوان مائية وورق أبيض، ونفضّي مكان... وننطلق في اللعب بالألوان باستخدام إيدينا أو فُرَش أو حتى باستخدام رجلينا، نلوّنها ونمشي عَ الورق! المهم نحسّ بطاقة الحرية، ونخرَّج توترنا عَ الورق بالطريقة الأنسب لينا.
٥ -النحت أو استخدام الصلصال أو الطين
الضغط وتشكيل المواد المتاحة عندنا، سواءً بحريّة أو واحنا عندنا شكل معيّن في بالنا عايزين نوصلُّه، بيساعدنا إننا نخرّج التوتر أو العصبية الموجودة من القلق.
٦ -التدوين اليومي
هنستخدم النوت بوك بتاعتنا ومعاها أي مواد أو أدوات من اختياراتنا، ونرسم صورة عشوائية أو صورة من خيالنا. التمرين ده هدفه إننا نسمح لنفسنا إنها تمشي بحرية أكتر بدون توقُّعات، وبالتالي ممكن اللي ندوِّنه يكون انعكاس لإزاي اليوم هيمشي، أو مزاجنا عامل إزاي، أو حتى شكل المشاكل اللي بنعيشها. بعد ما نخلص تدوين خدوا بصة على أعمالكو الفنية اللي دوّنتوها في يومكم وكمان دوِّنوا مشاعركو تجاهها بالكتابة، وإزاي الصور دي أثّرت فيكو.
٧ -الموسيقى
الموسيقى من الأدوات المهمة في تقليل التوتر في يومنا، علشان كده هنشارككم بتراكات موسيقى مناسبة للتمارين واللعب:
۸ -التلوين عالموبايل
Colorify تطبيق
ممكن نقلّل وقت استخدامنا لمواقع التواصل الاجتماعي والتوتّر اللي بينتج عنها كتير، بإنّنا نستخدم الموبايلات للتلوين عالتطبيق ده:
صحتنا النفسية مهمة جداً... ومع وجودنا في الوقت الحالي في البيت لفترات طويلة ممكن تكون المداوة بالفن واللعب بالألوان وسيلة للتقليل من توتُّرنا وقلقنا اليومي، وحاجة تساعدنا نعرف أكتر عن نفسنا ونستفيد بيومنا.
مقالات أكتر
Featured
