رزق من البيت .. ازاي نلاقى شغل من الانترنت
في الوقت الحالي بما إن قعدة البيت شكلها مطوِّلة، فكتير مننا بيمرُّوا بأزمات مادية ممكن تأثر على نمط حياتهم بشكل مزعج، وده بيخلينا نلجأ لبدايل زي الشغل على الإنترنت.
www.freelancer.com
يعني ايه؟
فيه منصات كتير موجودة على الإنترنت زي Freelancer, Upwork أو خمسات وحاجات كتير غيرهم، بيبقى عليها أشخاص أصحاب شغل من أماكن مختلفة من العالم بتطلب خدمات معينة زي "كتابة، ترجمة، تحرير، تصميم، مونتاج، داتا إنتري...) ليستة طويلة من الخدمات اللي ممكن نقدر نعملها بمقابل مادي كويس، ونقدر توصلّنا فلوسنا على حساباتنا البنكية، أو من على الكريديت كارد الخاصة بينا.
محتاجين ايه عشان نبدأ؟
حاجتين
أول حاجة “ نحدد إحنا بنعرف نعمل ايه؟ ”
لو خدنا منصة Freelancer كمثال، فهنلاقيها متقسّمة لفئات بالشغل المطلوب، سواءً زي ما قلنا قبل كده "كتابة، ترجمة، تحرير، تصميم، مونتاج، داتا إنتري..." وجوّة كل فئة من الفئات أنواع مختلفة من الشغل تخص الفئة دي. يعني لو أخدنا فئة الكتابة مثلاً هنلاقي أنواع من الكتابة المختلفة نقدر نعملها زي: كتابة مقالات، كتابة أبحاث، تدوين، كتابة محتوى، كتابة ويكي، وحتى كتابة الشروط والأحكام اللي بتبقى موجودة في بداية تنزيل البرامج لما يعملوا حساب على موقع جديد.
قيسوا على ده باقي الفئات بتاعة الشغل؛ فاحنا في أول احتكاكنا بالمنصات اللي بتقدم شغل أونلاين هنبقى متّاخدين بكمية الشغل المتاح على المنصة اللي هنستخدمها، واللي ممكن تكون حاجات بنقدر نعملها، بس الأحسن هو تحديد اللي تقدر تقوم بيه بشكل محترف وشايفين إننا نقدر ناخد مقابله فلوس.
تاني حاجة “ البورتفيليو المتين ”
يعني إيه بورتفوليو؟ باختصار هو كل حاجة انت عملتها تخص الشغلانة اللي أنت مهتم تقوم بيها. يعني فلان عاوز يشتغل كمصمم من البيت؟ البورتفوليو بتاعه بيحتوي على كل التصميمات اللي قام بيها، حتى لو كانت تجارب مع نفسه ومكانتش حاجة بغرض ربحي، أو معمولة بمهنية عالية.
ممكن نتجنّب إننا نحط معلومات شخصية أو نشارك معلومات حساسة مش حابّين نشاركها على صفحاتنا المبنية على مواقع الشغل من الإنترنت، ومش هتفرق مع صاحب الخدمة كتير طالما عندك بورتفوليو عليه شغلك بتبيِّن فيه اللي بتقدر تعمله.
— نصيحة على جنب: خليكو دايماً وانتو بتعملوا البورتفوليو بتاعكو على أي منصة من اللي هتشتغلوا عليها أونلاين إنكم تسلّطوا الضوء على موهبة أو حرفة واحدة من اللي بتقدروا تقوموا بيها، وتحاولوا توضّحوا للمستفيد من خدماتكم إنكم متمكّنين منها بقدر الإمكان؛ سوَّقوا لنفسكو صح من الآخر —-
- لو الشغل بتاعكو شغل حاجات تصميمية فهيكون Behance منصة كويّسة أوي تقدروا تحطوا عليها اللي عملتوه.
- لو شغلكو مرتبط أكتر بمجال الموشن جرافيكس، أو المونتاج، أو تصوير الفيديوهات فممكن تستخدموا Mega أو Vimeo.
- لو شغلكو معتمد على الكتابة وصناعة المحتوى، تقدروا تعملوا بورتفوليو ليكو على Contently
- وأخيراً، لو حابين، تقدروا تستخدموا منصات بتوفّر إنكو تعملوا مواقع مجانية زي Google Sites، وتعملوا لنفسكو موقع عليه من غير ما تحتاجوا يكون عندكم خبرة في إنشاء المواقع، وتتكلموا فيه عن مهاراتكم والأعمال السابقة ليكم.
مرحلة التنفيذ
لو إحنا خلاص عرفنا إحنا عاوزين نعمل إيه، وعندنا بورتفوليو كويس نقدر نتسند عليه، نبدأ ندوّر على شغل مناسب لينا واللي بنقدر نقدّمه.
أول خطوة هي اختيار المشروع اللي هنشتغل عليه؛ بنقرا تفاصيله الكاملة كويس، وناخد وقتنا في قراية حاجات زي السعر المحطوط ليه، بيشمل كام ساعة، الشغل المطلوب مننا إيه بالظبط، وهل ده مناسب للسعر المحطوط والوقت اللي هياخده... ونعرف تفاصيل أكتر عن الجهة اللي طالبة الخدمة.
تاني خطوة هي إننا بنقدم للمشروع وبنعرض اللي نقدر نقوم بيه، وممكن نتناقش في المبلغ المحطوط للمشروع كمقابل للشغل لو شايفين إننا محتاجين فلوس أكتر من كده، ونعرض البورتفوليو بتاعنا وأي تفاصيل تخص أعمالنا السابقة ممكن تهم صاحب الشغل إنه يعرفها.
— مفيش حاجة اسمها ضمان للشغل اللي هنعمله، أو إنكم تبعتوا لعميل فلوس قبل ما تشتغلوا، وإوعوا تقبلوا شغل من غير ما العميل اللي بيتعامل معاكو يكون موضّحلكم إنه مفعّل الدفع أونلاين، وظاهرلكم إنه طلب شغل من أشخاص تانية قبل كده ولا لا. —
تالت خطوة إن العميل يقبلكو للشّغلانة وتبدؤوا تتواصلوا. حاولوا في أول مرحلة من الكلام إنكو تتناقشوا في كل التفاصيل الخاصة بالشغلانة، وكمان تبقوا واضحين معاه في اللي تقدروا تعملوه واللي متقدروش تعملوه، وتفهموا منّه أكتر كل الحاجات اللي محتاجها، لأن ده هيخلّي الشغل أسهل بالنسبالكم، ومش محتاج تعديلات كتير فيما بعد. مهم جداً كمان إنكو تعرضوا رأيكم كأشخاص أصحاب خبرة على العميل اللي بيتعامل معاكو، وكمان اتفقوا على وقت معين لتسليم الشغل ويكون وقت مناسب ليكو.
أهم خطوة، وهي إنكو بعد ما تتفقوا تتأكّدوا إن العميل عمل حاجة اسمها Milestone Funding .. ودي إنه حط فلوسكو اللي اتفقتوا عليها بشكل يقدر يوصل لحسابكم على المنصة اللي بتستخدموها أول ما المشروع يتسلّم، ويوافق العميل عليه.
— مينفعش نوافق على أي مشروع متقدّم لينا من غير ما نتأكد من إن الخطوة اللي فاتت دي حصلت، لأن من غيرها ده بيعرّضنا إن ممكن شغلنا يتسرق من غير أي مقابل —
بعد ما نخلص شغل على المشروع في الوقت المحدد نقدر نبعته للعميل على الإيميل عن طريق We Transfer، أو نرفعه على كلاود زي Pcloud ونشارك معاه لينك للمشروع، أو لو ملفات صغيرة زي ملفات الكتابة والترجمة نقدر نبعتها مباشرةً للعميل على المنصة اللي بنشتغل عليها، وطريقة توصيل المشروع للعميل بتختلف من موقع للتاني.
العميل لو عجبه الشغل ساعتها بيعمل حاجة اسمها Milestone Releasing، وده إنه بيوصلّك فلوسك اللي اتفقتوا عليها من الأول لحسابك على الموقع.
تيبس زيادة
أهتموا إنكوا تعرفوا أكتر عن المشروع وتفاصيله من العميل وتتناقشوا معاه فى كل تفصيلة وتسعوا إنكوا تعملوا شغلكوا بأحسن شكل.
لو نفذتوا الشغل بشكل وجودة كويسة وسلمتوه فى الميعاد المحدد, ده بيرفع من فرصكوا أنه العميل يكتب عنكوا فيد باك كويس للموقع, ده مفيد للشغلانات اللى هتقدموا عليها بعد كده.
متقبلش مشروع من غير ماتتأكد أنه تم تمويله Milestone Funding من العميل وجاتلك رسالة على الموقع أو إيميل بده.
اختاروا عدد ساعات الشغل المريحة ليكوا وقدروا المقابل باللى شايفينه مناسب ليكوا, بس ألتزموا بتقديم شغل كويس ومقبول.
حددوا اجازات للشغل ومتخلوش الشغل على الانترنت يبقى كل حاجة بتعملوها فى يومكوا.
مواقع للشغل الاونلاين
عشان نعمل بورتفيليو
منصات لرفع وإرسال الشغل
مقالات أكتر
Featured
